鄧媽媽請客，鄧氏後人傾巢而出。鄧氏唔少親戚遠道從外國返港，挽住大包細包禮物祝壽。William細佬一家移民多倫多後，十幾年未返港，呢晚帶埋太太Barbara及兒子鄧卓謙、鄧卓浩探望鄉親；William姐夫就拖埋囡囡及未來女婿由英國來港飲喜酒。兒孫聚首一堂，鄧媽媽食飯都特別開胃。

鄧媽媽（左五）擺壽酒，移居外地多年嘅兒子Philip（右一）、新抱（左一）及外籍女婿（右二）專程返港祝壽。	莊偉茵（右二）話，喺祠堂食盆菜風味十足，冒住嚴寒都要拉老公黃楚權（右）嚟湊熱鬧。	屏山盆菜出名以柴火烹調，火候十足，前晚一共開咗四十八席。

盆菜宴前，William請嚟一對麒麟為媽媽拜壽，醒獅隊表演打觔斗及凌空飛腿，睇到班老外目瞪口呆，拍掌叫好。

人山人海 加開五席

William話，搞盆菜宴最初只為娛己，估唔到反應奇佳，一搞就十幾年，唔少設計界好友及外國傳媒今年聞風而至，令祠堂座無虛席，William臨時加開五席至四十八席，本來想再加枱，但大廚話廚房食物已悉數沽清，唔夠餸分嘞。開餐時人頭湧湧，部分人連櫈都無得坐，不過大家覺得喺祠堂食盆菜極之難得，逼啲都唔介意。

屏山盆菜出名以柴火烹調，火候十足。盆菜由下而上分別擺放蘿蔔、豬皮、枝竹、魷魚及豬肉，堆到成座山咁高。每圍仲有幾款屏山美食，包括陳皮燉鴨湯、雞汁燴冬菇、酥炸門鱔及雞汁飯，卓妮覺得盆菜最正，腩肉炆得極腍，枝竹及魷魚吸收南乳汁後惹味又開胃；而燉鴨湯用原隻鴨加上靚陳皮清燉，味道鮮甜。

賓客堆中，卓妮發現國泰企業事務董事莊偉茵都係座上客，佢話香港過年氣氛愈來愈淡，難得屏山咁熱鬧，一於帶老公黃楚權嚟開餐。

卓妮