建制派立法會議員今日會喺政制事務委員會上提出動議，要求政府主動修例，規定辭職議員唔可以喺餘下任期參加補選，力阻公民黨同社民連藉補選搞「變相公投」。原來建制派內部為咗由邊位議員提出動議，都經過一番角力，據聞專業會議梁美芬手瓜夠硬，好大機會做代表提出動議。
據講建制派原本將動議交由民建聯議員提出，但點知最後讓咗畀梁美芬，但條件係要跟足民記嘅動議字眼，不能加多減少。其實梁美芬早前已計劃提出限制辭職議員參與補選嘅私人草案，但各方認為喺分組點票下好難通過，如果今日通過動議成功逼政府修例，咁佢就毋須再提出私人草案嘞。
建制派將咁重要嘅動議交託梁美芬，證明梁美芬都有啲計，其實立法禁止辭職議員唔可以喺餘下任期參加補選，一開始都係梁美芬表現最積極。建制派最後讓佢提動議，可以詮釋為：和諧最重要，喺呢個重要時刻，槍口要一致向外。