卓妮第一時間恭喜蔡會長上榜，點知佢面露疑惑表情，話唔知自己上咗富豪榜，皆因佢啱啱喺日本考察完返港，未得閒睇報紙。對於突然升呢，蔡會長坦言「上榜唔係咁好」，皆因佢作風低調，雖然爸爸係海產大王蔡繼有，但父親從小教佢節儉成家，返學無得坐私家車，家住般咸道要徒步行半粒鐘返聖保羅男女校，即使長大後接掌家族生意，都堅守開源節流原則。

吳永嘉（左）、盧文端（中）及施榮懷（右）包晒全場茅台酒賀黃友嘉。	尹德勝交棒，黃友嘉（右）成新任會長，黃父黃保欣老懷安慰。	楊華勇（左）、莊家彬（右）都話飲起茅台停唔到口。

方文雄話自己唔入流

方文雄亦非常謙虛，被問到家族上榜有乜感受，佢謙稱《福布斯》搞錯咗，自己根本唔入流喎，真係識講笑，但佢不忘勉勵年輕人努力向上：「唔想被邊緣化就要努力做嘢。」呢番話認真發人深省。

排名跳升嘅李運強就顯得好興奮，話唔明《福布斯》去年點解評得佢咁差：「我一向有實業做緊，內地亦有好多廠房㗎！」今年紙品生意大旺，李主席嘅荷包應該脹卜卜嘞。

講番就職禮，廠商會元老級人馬陳永棋、楊孫西、盧文端及立法會廠商會代表林大輝都在座。黃友嘉揸住酒杯滿場飛敬酒，忙到一啖飯都無食，空住肚皮同嘉賓乾杯，前會長尹德勝都嚟敬佢一杯。為祝賀黃友嘉，商會內的兄弟費盡心思，副會長施榮懷聯同身兼茅台之友會秘書長嘅吳永嘉同盧文端一齊送出多支茅台酒，任飲唔嬲。

卓妮