政府聲言要加強同八十後青年人溝通，包括多利用Facebook等新興網上溝通工具，考起一班可能連上網同收電郵都唔多識嘅老餅高官。民政事務局局長曾德成前日以冇時間為由，將開Facebook嘅責任推咗畀副手許曉暉。正喺度做政改諮詢嘅政制及內地事務局局長林瑞麟尋日被問到會否喺Facebook開戶收集意見，只肯講佢個局現已有透過電郵收集市民意見，然後一邊話趕時間、一邊衝咗入廁所，冇回應會否開Facebook。