克勤仔話佢年年都有落區寫揮春，以往淨係識得寫「大吉」兩個字，頂多都係寫多個「靚」字氹師奶，創意就有喇，但美感就欠奉，所以今年佢下定決心向書法了得嘅嬌姐拜師學藝，希望可以學識點樣寫個靚「福」字。

嬌姐就大讚克勤仔天資好，話自己只係示範咗兩次畀佢睇，佢就可以駕輕就熟，作為師傅都好滿意。

克勤仔就話自己為咗寫靚個「福」字，足足苦練咗一個禮拜，加上日日都落區寫成千幾二千張，想寫得核突啲都幾難，只要八秒就可以起貨喎。不過佢自爆曾經畀街坊質問佢點解寫嘅「福」字同嬌姐嗰個一模一樣，搞到佢好鬼尷尬。睇嚟克勤仔都係唔可以一本天書睇到老，想氹掂班街坊，都係要加把勁練多啲字啦！