中環出更：心形煙花賀蔡加敏懷孖胎
玩具大王蔡志明千金蔡加敏（Carmen）月前再度傳喜訊，卓妮八到，Carmen呢胎原來懷孖胎，認真係雙喜臨門。老公馬鴻銘（John）興奮過中頭獎，早前贊助十‧一煙花匯演，靜雞雞叫大會向天空發放多個心形煙花，又播放歌曲《愛你一萬年》，公開冧太太！
煙花夜，蔡家齊出動，悉心打扮嘅蔡太李惠莉與老公蔡志明、囡囡加怡、囝囝加讚齊到賀。懷孕四個多月嘅Carmen抱埋兩歲大B女靄翹亮相，講起懷孖B，Carmen顯得雀躍，不過呢胎的確分量十足，令Carmen覺得易攰，最慘係嘔得犀利，令佢唔似佗上一胎咁擦得，只好食得清淡啲。咁到底係孖仔、孖女定係龍鳳胎呢？佢就話保持神秘唔肯講住。
老婆呢頭有喜，老公就贊助成二百萬放煙花，唔通係提早慶祝？阿John笑笑口話，贊助一事大半年前已拍板，咁啱啫。今年佢以香港九龍潮州公會永遠名譽會長兼達成集團執行董事名義贊助二百萬，加埋多位潮州名人包括許學之、高佩璇及方平等人贊助，促成璀璨煙花夜。
嚟捧場睇煙花嘅有唔少東華人，包括前東華主席馬清鏗及李三元一家，仲有東華副主席張佐華（Charles）同施榮恒，原來阿John係○二年嘅東華主席，請班東華兄弟睇煙花，相當念舊。
廣華百歲生日 東華大搞
講開又講，仲有半年Charles張就接棒做東華主席。明年東華旗下嘅廣華醫院一百歲生日，佢計劃call晒曾經喺廣華出世嘅人開生日party。
晚宴上有唔少「潮州冷」撐場，包括康泰董事長黃士心。講起菲律賓挾持人質事件重創菲國旅遊業，黃生話，預計遊菲團會沉靜多兩個月，起碼到聖誕節先有起色。佢又透露，康泰為殉職領隊謝廷駿籌募嘅善款至今未停過，唔少係來自與康泰有合作嘅海外生意夥伴，專戶已收到三百八十萬捐款，經核數師核數後，康泰稍後會將善款交畀謝家。
卓妮