工展會係香港名牌，為吸四方財，廠商會連廣西脈絡都打通埋，首次登陸南寧搞「香港時尚產品博覽會」，結果豐收而回。廠商會副會長兼展覽服務公司主席施榮懷尋日搞慶功宴，佢話此行啟發良多，去到南寧先知當地人唔興夜晚出動掃貨，幾乎大失預算。
初次落戶南寧「開檔」，營業時間由朝十至晚九，點知每日下午五點後人流突然「鳥獸散」，原來全部返屋企開飯。施榮懷話，當地人視晚飯大過天，仲要黃昏就開餐，一度令展場入夜後拍烏蠅，好彩港商出名轉數快，急謀對策推出優惠，臨尾一日劈價大傾銷，結果六日展期共吸引逾七萬入場人次。當中以模型車、護膚品同家用品最好賣。施生仲話，南寧女士唔知「Foot Cream」（腳部滋潤霜）為何物，掃貨時寧買潤手霜都唔要腳霜喎。
講番香港工展會，今年入場人次創新高，不過為免市民排長龍買飛。施生話，明年會考慮以八達通收費代替買飛入場。