即係咁，假設你係喪心病狂嘅冷血兇徒，專揀行人專用區一嘢將鏹水彈掟落街，由於呢種係蓄意行為，咁就叫做高空擲物。但係有時又唔一定係蓄意嘅，可能係大風吹跌花盆，可能係外牆石屎剝落，由於呢種不涉及人為主觀意願，咁就叫做高空墮物。

講咗咁耐，功夫茶到底想講乜？無他嘅，想講兩個物理現象，舊樓係會日久失修嘅，地球係有地心吸力嘅，兩相結合之下，砰嘭！你個頭崩咗！佢個額裂咗！

由於高空墮物呢家嘢困擾咗香港人好耐好耐，最慘係防不勝防，所以發展局局長林鄭月娥宣布，推出強制驗樓及驗窗計劃條例草案，由業主負責出錢維修。草案今日刊憲，二月三日提交立法會，如果順利通過，即係冇人好似反高鐵咁樣左反右反，預計最快可於二○一一年第四季執行。

乜嘢舊樓有必要強制檢驗呢？樓齡超過三十年嘅大廈每十年驗一次，不高於三層嘅住宅除外。至於驗窗咯喎，樓齡超過十年嘅大廈每五年驗一次，同樣嘞，不高於三層嘅住宅除外。

強制驗樓驗窗嘅基本精神係無可厚非嘅，係人都唔想受害於高空墮物橫死街頭㗎啦。問題係，擁有三十年舊樓嘅業主，通常係上咗年紀嘅公公婆婆，人又老，錢又冇，棺材本都未夠數，你叫佢哋邊有能力維修呢？

有一位住喺深水埗汝州街舊樓嘅郭伯伯講得好絕核，佢質疑政府以強制驗樓為名創造就業機會：「即係搵啲老人家笨，叫老人家出錢請啲後生仔做嘢！」

郭伯伯呢種獨特邏輯未嘗唔係一種創見，之不過咁，功夫茶諗到另一個問題。喂，驗樓話就話強制啫，驗完樓之後有冇強制維修呀？睇來睇去唔多覺囉，因為屋宇署話喎，唔會要求業主清拆僭建物，只會發出警告，然後「鼓勵業主自願清拆」。

呢嗱，假設你係身無長物又風燭殘年嘅獨居長者，完全唔介意自己嘅居住環境破破爛爛，係都唔驗樓，即使肯驗樓，打死都唔出錢維修，你咬佢食呀？你唔好話林鄭月娥夠膽捉佢去坐監呀，欺負一無所有嘅老人家罪名好大㗎！

所以話啫，呢個政策存在好大漏洞，空有強制驗樓，並無強制維修。畢竟講錢傷感情吖嘛，你叫舊樓業主自動自覺維修，當然未必人人制。

香港業主會會長佘慶雲更加感到無奈，佢擔心新政策會喺業主之間製造糾紛，引發更深層次矛盾，因為維修涉及幾百萬元利益，一定會爆發好多問題。

計功夫茶話齋，反高鐵前車可鑑，政府做事唔好再咁草率，萬一不滿被搵笨嘅舊樓業主又去包圍禮賓府，咁就眼冤咯！