商務及經濟發展局常秘蔡瑩璧（Yvonne）身為中環人，同好多打工仔一樣要為餐「晏仔」四圍搜羅美食，最近佢喺同事介紹下，幫襯咗九如坊開張無耐嘅大班樓中菜，最愛就係鎮店之作滷水豬下巴配蜂巢豆腐，豬下巴薄片軟滑得嚟好爽，而豆腐蒸完後再油炸，呈現一個個蜂巢洞，吸收晒含有豬肉香嘅滷水精華，令平凡豆腐顯得不平凡。
大班樓開業只有幾個月，食物質素確令人驚喜，選用上等新鮮食材，標榜不加味精，招牌菜除咗滷水豬下巴配蜂巢豆腐外，仲有酥炸獅頭魚配陳醋、天麻川芎白芷燉龍躉頭、雞油花雕蒸大花蟹配陳村粉、野生羊肚菌炆腐皮、十八味雞等，淨係菜名已相當吸引。
該店甜品亦好有特色，其中桂花杞子雪糕以日本北海道牛奶製作，與中藥材大玩fusion，真係別有心思。
卓妮