問題一：邊個係食物及衞生局副局長？

一，二，三，冇人識答，下一題！

問題二：究竟乜水係商務及經濟發展局副局長？

四，五，六，又係冇人識答，下一題！

問題三：邊個係……唉，諗諗下，唔好再問嘞，照計都係冇人知道邊個係環境局副局長。

計功夫茶話齋，呢啲題目咁艱深，如果《百萬富翁》電視節目仍然存在，實在有資格列入價值百萬最難答嘅終極問題。

的而且確係好難好難好鬼難o架，港大民意研究計劃電話訪問約一千名市民，結果顯示，九名副局長之中，有七人認知度超過零。而九名政治助理之中，六人嘅認知度係零。加加埋埋，所有官員嘅認知度不足百分之二。

唔經唔覺同類調查已經橫跨十八個月，總共進行過七次，香港市民由始至終認唔出副局長到底乜水打乜水，政治助理更加唔使講，簡直就係一班與世隔絕隱形男女。由於情況持續而且呈現倒退迹象，所以港大民意研究計劃總監鍾庭耀就宣布嘞，決定即日起停止有關調查，將資源撥去其他更有意義嘅工作。

唔知大家點諗，功夫茶就覺得好冤枉。喂，記唔記得曾蔭權最初點解要擴大問責團隊呀？點解要額外耗費大量公帑聘請擁有外國護照嘅「八國聯軍」呀？佢話喎，係分擔局長工作，由副局長面向傳媒以及公眾。既然係咁，因乜事幹一個二個好似忍者龜咁藏頭露尾，竟然冇人認得出佢哋嘅尊容？點解知名度會比堅守石崗菜園村嘅高婆婆更低？

講真，你又難怪鍾庭耀扯白旗投降㗎，十八個月咁耐嘞，問來問去得個吉，成班名義上係政府重要成員嘅高官，實際上竟然係一堆面目模糊嘅不知名物體。你話吖，大拿拿年薪加埋幾千萬嘅公帑，係咪浪費得非常之咁冤枉！

話時話，雖然造價六百幾億嘅高鐵係貴到飛起啫，又隨時會出現高速變低速嘅尷尬場面，不過始終叫做行得郁得有實際用途；成班副局長知名度低得咁交關，成績表又乜都未見過，呢一堆不知名物體大概比高鐵更加物非所值。

講到呢度，功夫茶發覺已經冇乜嘢可以再講，樣又認唔到，名又噏唔出，政績亦係交白卷，試問仲有乜嘢話題可以延續落去？正如你同一個全無反應嘅透明怪人傾偈，講完一句已經冇第二句。

吖，有有有，仲有一個話題。既然成班副局長就好似專玩自閉嘅官場宅男咁，又可稱為隱蔽中坑，反正作用不大，根本如同虛設，不如索性大幅裁減人手，年中慳番幾千萬接濟飯都冇得食嘅貧苦大眾好過啦！