20/01/2010

播放本新聞相關短片

沙朗布朗彈紅入樽賽

「大帝」勒邦占士上年喺明星賽揚言會參加今年嘅明星周入樽賽,令全球籃球迷引頸以待,但NBA尋日公布今屆入樽賽參賽者名單,竟然冇「大帝」個大名,原來占士哥都係隨口噏當秘笈,搞到粉絲非常失望。去年擊敗杜域侯活嘅尼特羅賓遜會進行衞冕,並接受「彈弓人」沙朗布朗嘅挑戰。

現時肯定獲入樽賽參賽資格嘅有衞冕嘅紐約人後衞尼特羅賓遜、山貓前鋒謝勒華萊士及今年人氣急升嘅湖人後衞沙朗布朗,而最後一個參賽資格就要由快艇後衞艾歷哥頓及速龍新秀迪羅辛,在新秀對抗賽中場休息時通過PK賽決出。

昨領湖人反勝魔術

雖然「大帝」甩底,但沙朗布朗同樣夠號召力,皆因呢位後衞僅得6呎4吋高,但彈跳力就出名驚人,自加盟湖人後,其入樽及封阻片段經常紅爆網絡,所以湖人亦在球隊官網成立咗LetShannonDunk.com,幫呢位紅人造勢。

沙朗布朗亦冇辜負湖人厚愛,皆因佢近期表現愈來愈好,尋日領袖高比拜仁繼續失準僅得11分下,沙朗布朗後備上陣攻入全隊最高22分,協助湖人在第四節打出士氣,最終以98比92反勝勁旅魔術。

本報綜合報道