八十後點解咁扯火？原因可以好複雜，亦都可以好簡單，一個字講晒：窮。窮小子覺得前景黯淡吖嘛，所以咪憤世嫉俗囉。之不過咁，功夫茶認為，香港有一班人其實應該更加扯火，如果佢哋有氣有力，隨時都會包圍禮賓府，佢哋就係——十八後！

當然啦，十八後只係一個籠統稱呼，其實可以係二十後、三十後或者四十後。總而言之，十八後即係公公婆婆老人家。

唉，一個人活到七老八十，梗係希望安享晚年o架啦，之但係香港嘅十八後悽悽慘慘戚戚，待遇惡劣到冇朋友。風燭殘年嘅你想入住老人院咩？輪候時間長到呢，唔止等到頸都長，隨時等到命都冇。如果你有幸入住老人院，功夫茶祝你好運，千祈唔好遇到「必遭天譴」嘅人渣護理，否則一個唔覺意有人餵食屎就該煨咯。

入住老人院嘅輪候時間到底有幾長？大概二十二至四十個月，即係可能等足三年半。假如你係十八後，今年即係九十二歲，你估你有冇命等得切吖嗱？

為咗解決老人住宿照顧服務問題，安老事務委員會委託香港大學進行顧問研究，建議包括為申請入住資助安老院嘅長者引入資產審查。所謂資產審查，即係有錢冇得輪候老人院，窮到燶先至有資格，篩減一大批申請人之後，輪候時間自自然然縮短。

喂喂喂，唔該唔好再玩曾蔭權嗰一套忤逆仔把戲得唔得？大家都記得啦，煲呔曾舊年失驚無神提出長者生果金引入資產審查，結果激嬲全世界，莫講話十八後幾乎爆血管，連八十後、七十後、六十後、五十後同樣眼火爆。係人都知，長者生果金嘅設計原意係回饋辛辛苦苦服務香港幾十年嘅老人家，就好似仔仔女女孝敬爸爸媽媽咁，冇可能因為老竇老母有少少錢，就唔請佢哋飲茶。

同樣道理，特區政府提供老人院服務，亦係後輩報答長輩嘅應有之義，你家陣夠膽死又話要引入資產審查，係咪鼓勵老人家趁早做敗家仔，花光積蓄之後先至孑然一身入住老人院？一個上咗年紀嘅人，勞碌一世剩低十萬八萬棺材本，好平常嘅啫，如果就因為咁而被剝削安享晚年嘅資格，你話幾咁冇天理！

所以話啫，老人家若然有氣有力，真係會包圍禮賓府o架，等你狠毒得咁狼心狗肺吖嗱！

講到呢度，功夫茶忽發奇想，如果有人發明一部「良心探測機」就好咯，嘟一嘟就知道一個人有冇良心嗰隻。只要有咗呢部機器，怒火中燒嘅十八後就可以企喺政府總部門外嚟個絕地反擊，進行官僚良心大審查——嘟，呢個冇良心；嘟嘟，呢個又係冇良心；嘟嘟嘟，哦，原來最冇良心嗰個係資產審查嘅始作俑者煲呔曾！