政情：選委會增席位KK燃戰火

現時選委會嘅四大組別，分別係工商金融界、專業界、勞工社會服務及宗教界同政界，各有二百席，旗下再設分組。按政改方案，下年十二月改選嘅選委會，面貌一新，四大界別各增一百席至三百席，其中政界中嘅七十五席撥歸區議會，加上區會原有嘅四十二席，就會變身一百一十七席嘅第一大選委；餘下二十五席，立法會同全國政協委員各分十席，五席畀鄉議局代表。

圖擴至90席 僅次區議會

不過，選委會其餘三大界別點樣分餅仔，方案無交代，一場不同利益團體之間嘅激烈角力勢所難免。ＫＫ話，全港打工仔三百萬人，工會達七百個之多，但《基本法》當年設計選委會時，重工商、輕勞工，工商界佔盡第一界別嘅二百個選委議席，而勞工界喺第三界別就要同漁農、宗教、社福同體育演藝文化及出版界均分，即只佔四十個位，席數與代表性唔成正比，要求趁政改契機修正，將新增一百個議席嘅一半撥歸勞工界，即擴大至九十席，僅次於區議會組別。ＫＫ咁明刀明槍為業界擴充地盤嘅，仲係第一個，選委會戰場未到本地立法階段，已將戰火燒起。

目前選委會勞工界四十席中，工聯會佔約二十五席，勞聯約十席，餘下由公務員團體取得。勞聯立法會議員李鳳英話，勞聯未傾過選委會安排，但作為業界代表，佢都贊成加多啲位畀勞工界咁話。

不過，民主黨張文光就強烈反對，指親建制嘅工會現時壟斷晒勞工界選委會議席，再大幅加位，即係擴大壟斷，令傳統工會可以左右特首選舉大局，佢仲講，既然ＫＫ話代表三百萬名打工仔，咁就不如將勞工界選委交由全港打工仔以一人一票產生啦。選委會戰場果然惹火，咁快已經炮聲隆隆。