山貓向來作客成績差劣，但經過對上兩戰客場贏波後，球員信心明顯返晒嚟！尋日輪到佢哋主場出擊，憑史堤芬積遜及謝勒華萊士合共攻入57分，以113:108擊敗公牛，聽朝造訪紐約人戰意鮮明，有望再贏一仗！

主場劏牛信心倍增

踏入新年後，山貓表現確實好醒神，先後作客熱火同騎士都凱旋而回。尋日返到主場鬥公牛亦繼續交到功課，一度喺第2節領先13分。雖然由戴歷羅斯帶領嘅公牛積極反撲，仲喺完場前兩分鐘時追至105:105平手，但山貓最後憑住梅利、史堤芬積遜及謝勒華萊士先後射入罰球，以113:108成功劏「牛」！

山貓贏波功臣之一嘅史堤芬積遜將贏波歸功於球員信心大增：「經過連續兩場作客贏波後，大家都有自信迎接嚟緊嘅賽事。」山貓聽朝對弱旅紐約人，有望爭取作客3連捷。