合和董事總經理胡文新(Thomas)係超級冰球迷，做咗香港業餘冰球會主席後不遺餘力推廣冰球活動，繼早前支持中國女子冰球隊到溫哥華參加冬季奧運會後，元旦日更率領香港業餘冰球會去哈爾濱參加國際業餘冰球邀請賽。Thomas話，冰球要喺冰天雪地嘅環境下打先有氣氛，平時喺九龍灣MegaBox溜冰場打波，最低氣溫都係攝氏零度；今次去到哈爾濱，氣溫只得零下三十度，係三十年來當地最嚴寒元旦日，但喺咁嘅環境下打冰球，Thomas就過足癮，仲落場同隊員一齊出賽。
雖然香港隊最終無緣攞獎，但Thomas話友誼第一，輸贏唔重要，最緊要大家打得投入過足癮，見佢打到滿身大汗，連個頭都濕埋。此次出戰東北，Thomas可謂出錢出力，除咗親自領軍，仲以香港冰球訓練學校名義贊助全隊共十九人嘅機票連食宿，認真唔話得，期間仲獲黑龍江省副省長孫堯接見，Thomas就代表球會送上球衣一件。