「姚明嫂」葉莉已經證實有喜，原來佢已經懷孕四至五月，所以預計姚大俠於今年五至六月，就會正式榮升爸爸！雖然有指姚明好想一索得男，繼承佢衣鉢征戰NBA，但有專家指「姚寶寶」係千金嘅機會較大。

葉莉好友苗立杰及姚之隊新聞發言人日前相繼證實葉莉已懷孕，據悉葉莉現時已放低所有工作全力安胎，並一改夜睡習慣，現時晚上十時前一定上床睡覺，努力安胎及進補下，發福不少。

誕千金機會較高

因姚明身高達到2米26，而同屬籃球員嘅葉莉就有1米9，所以有傳媒用上歐洲科學家所歸納出嘅一套計算方法，推算出若然「姚寶寶」係男仔，身高就會有2米25，拍得住老竇；若然係千金，就有1米99，仲高過1米98嘅波神米高佐敦，肯定屬於籃球員材料。有專家估計，因大多數運動員都係生女居多，所以預期「姚寶寶」係千金嘅機會較大。