廣東點心囊括中國飲食文化精粹，歎番一盅兩件已成為港人生活一部分。廠商會副會長施榮懷食晏無點心不歡，心水選擇係位於灣仔駱克道嘅車氏粵菜軒，佢鍾意啲點心用料新鮮，夠熱辣辣。
施榮懷早年經營酒樓，吃盡天下美食，酒樓結業後，唔少大廚及伙記轉投由藝人車婉婉媽媽車綺芬開設嘅「車氏」，施生都跟埋「過檔」，每次飲茶或請客都去捧舊伙記場。必食點心包括鬆化炸芋角及酥皮叉燒餐包，佢話芋角炸得香脆，保留濃濃芋頭香味，而酥皮叉燒餐包內含豐富叉燒肉汁，外脆內軟，整法咁獨特，唔係好多地方食得到。
想食得清淡啲，佢推介品嘗車氏嘅六味齋煲，材料包括黑木耳、芋頭、腐皮、豆角、茄子及竹笙等，烹調惹味，令人食過翻尋味，怪唔得紅歌星王菲每次返港都指定去「車氏」歎點心，聽講千億新抱徐子淇及藝人張栢芝一家都係常客。
卓妮