區議會選舉在即，除咗泛民主派及傘兵撞區外，建制派之間亦未能完全協調，一不小心隨時益咗對手。早前自由黨為還擊新民黨派人去東區北角丹拿選區搶位，隨即派人去東區太古城東選區服務，疑似挑戰現任新民黨區議員謝子祺，為選情增添唔少變數。不過，聽聞自由黨並非謝子祺嘅真正對手，反而港大前學生會會長兼港大校友關注組副召集人王振星先係競敵。
港大副校長遴選風波沒完沒了，但造就咗港大校友關注組聲名大噪，或對有意參選太古城東選區嘅王振星有利。本身係工程師嘅王振星，九七年擔任港大學生會會長，仲有份將「國殤之柱」由維園運去港大，立場明顯傾向泛民。佢早前成立咗「太古社區工程」組織，積極擴展社區網絡。
王振星除咗擁有專業背景，再加上勤力落區，已經對謝子祺造成好大威脅，若再加上自由黨派出青年團內務執委黎亮加入戰團，隨時分薄謝子祺票源，或會令王振星坐收漁人之利。有分析指，太古城係中產區，有唔少選民都傾向支持泛民，由一二年立法會選舉中可見，當年公民黨喺該區得二千三百幾票，但新民黨只得一千一百幾票，票數相差一倍有多，區選一向講求地區工作係咪紥實，政治立場反而係其次。