金價攀升，坊間又再掀起一片搶金熱，但唔少人嫌金器「娘」，結婚時買落嘅金鈪、金鏈都收埋唔戴，著名時裝設計師何志恩（Johanna）近日發起金飾潮戴運動，帶頭將龍鳳鈪配上黑皮繩當潮物戴出街。
Johanna早前來個親身示範，為周大福設計四套生肖服飾，用嚟配搭對方推出嘅十二生肖金飾系列。Johanna以豬、虎、蛇、猴為主題，設計咗粉紅色吊帶蛋糕裙、大熱連身褲Jumpsuit、露背裝及拖尾長裙，請嚟城中名模率先着上。
時裝騷當日，Johanna摷番結婚時戴過嘅龍鳳鈪當首飾戴上身，佢話咁做係覺得戴銀器有點Out，一於破格啲。不過戴住金鈪出街，Johanna話行街都驚畀人搶嘢喎。Johanna又會於明年一月推出首個時裝售賣網站出售個人品牌，佢話為開拓客源，要大膽試新嘢至得。
卓妮