唔使估啦，呢個獨家觀光項目叫「港九籠屋遊」。嗱，全世界都知香港樓價貴，超級豪宅呎價賣到七萬幾蚊，全球數一數二。但遊客一定諗唔到，如果按呎租計，籠屋租金隨時比超級豪宅仲要貴，面積幾十呎嘅籠屋，平均呎租三十至五十蚊，業主仲嫌唔夠貴，近年搏命加租，部分呎租高達九十蚊，連山頂豪宅都望塵莫及。你話喇，睇完天價豪宅再睇「癲價」籠屋，遊客係咪好震撼、好刺激呢？

入去籠屋望真啲仲刺激呀，起居飲食統統喺嗰幾十呎地方，悶熱狹窄，天時熱閒閒地有三十八、九度，曱甴、老鼠周圍走，環境惡劣不特止，唔少地方連基本消防同衞生設施都冇，分分鐘爆大鑊。咁嘅人間地獄，遊客一定眼界大開啦。

唔講唔知，依家本港仲有近十萬人租住籠屋、板房同天台屋。社區組織調查發現，籠屋居民月入中位數得三千二百蚊，租金支出佔收入三到四成，剩番一千幾百蚊要應付一家幾口成個月嘅生活開支，你話點頂？

尋日有百幾個籠屋、板房同天台屋居民趁住聖誕，帶同兩萬名市民嘅簽名遊行到政府總部「贈興」，要求當局取締籠屋，增建公屋，安置居民。正如社區組織人士話齋，任由籠屋繼續存在，簡直係香港嘅恥辱。

其實，正確啲講，呢個唔係香港嘅恥辱，而係香港政府嘅恥辱。香港自稱係先進國際大都會，港府高官甚至以「紐倫港」自居，但香港嘅貧富懸殊卻全球稱冠，窮人超過一百二十萬，籠屋居民有乜法子唔多吖。至弊港府除咗裝模作樣間中做幾場扶貧騷外，乜都唔做，連嗰個扶貧委員會都摺埋，任由窮人自生自滅，你話幾無良吖。

話時話，籠屋問題已經長期存在，社區組織過去不斷要求當局正視及解決，但始終冇人理會，可見班高官根本冇心幫助基層市民解決住屋問題。其實只要當局肯增加些少資源，幫籠屋居民改善居住環境，例如起多啲公屋同適當降低申請門檻，協助佢哋盡快上樓，籠屋呢個香港之恥早就成為香港歷史啦。

港府冇心扶貧，煲呔曾仲死撐話「收入低於綜援才是貧窮戶」，簡直九唔搭八，唔通真係要餓死人先至算係貧窮？唉，港府涼薄，官員冷血，「籠民」有乜法子唔愈來愈多，香港有乜法子唔愈來愈丟架吖！