26/12/2009

播放本新聞相關短片

明星賽次輪投票高比壓大帝

NBA官方尋日公布明年達拉斯明星賽第二輪投票結果,「小飛俠」高比拜仁以138萬多票壓倒「大帝」勒邦占士,暫成今季「票王」。至於早前揚言就算獲選亦唔會出席明星賽嘅麥基迪,就被拿殊趕過跌落西岸後衞第三位,不過佢都不忘多謝中國粉絲嘅支持,皆因佢都知道大部分選票係來自中國。

將於明年二月十四日舉行嘅達拉斯明星賽,現時仍在投票當中,其中網上投票就會喺一月十八日截止。根據NBA官方資料顯示,經過第二輪投票後,現時獲得最多票數係湖人當家球星高比拜仁,達到138萬多選票,較第二位嘅勒邦占士多出6萬多票,而暫列三至五位分別有熱火後衞韋迪、魔術中鋒杜域侯活及金塊前鋒安東尼,前五統統屬於「夢八」成員。

麥基迪多謝中國fans

至於今季只係打咗45分鐘比賽嘅麥基迪,原本在西岸後衞只僅次於高比仔而已,但日前佢已經畀拿殊過咗頭,以數千票落後跌落第三。不過麥基迪受訪時表示,估計自己有九成選票來自中國,所以無論如何都要感謝中國球迷嘅支持。

至於另一個票數急升嘅球員就係「AI」艾佛遜,自從佢重返費城之後,選票亦直線上升,現時佢獲得63萬多票,升上東岸後衞「阿二」,大有機會再次以正選身份,為東岸出戰明星賽。