唉，你知啦，特區政府有一家嘢好奇怪，硬係鍾意半死不活將大型工程擱置甚至取消，家陣有一個啟德郵輪碼頭動工，點都算做好過冇。大家記唔記得香港仔漁人碼頭？搞下搞下，胎死腹中。大家應該記得西九文化區，整下整下，推倒重來。大家只要記憶力再好少少，自然又會記得自從回歸以來，波瀾壯闊嘅乜乜中心物物港大規模消失得無影無蹤。

講番郵輪碼頭本身吖，過程又係九死一生。討論咗十幾年㗎喇，被迫喺貨櫃碼頭上上落落嘅郵輪旅客等到頭髮白，去到舊年臨門一腳，吖，政府話投標條件未如理想喎，所以又要重新招標。到頭來，因為冇私人意向書符合標準，所以最終由政府出錢設計同埋建造。諗番轉頭，險過剃頭，啟德郵輪碼頭幾乎又係瓜柴瓜到直一直。

全面落成之後，啟德郵輪碼頭將會有兩個靠岸泊位，可停泊全球最大排水量二十二萬噸嘅郵輪，連同尖沙咀海運碼頭現有泊位，香港未來會有四個泊位。曾蔭權又話，未來會加強與內地沿海省份共同開拓郵輪航程，鼓勵業界培訓人才。自從中央容許內地旅行團乘坐以香港為母港嘅郵輪經香港到台灣旅遊之後，明年將有大約二十班次相關郵輪航程，接載近三萬名旅客。

可能動土儀式高興得滯啩，曾蔭權政府自吹自擂話喎，啟德郵輪碼頭冠絕全球！

可停泊全球最大排水量二十二萬噸嘅郵輪，係咪就等於世界第一呢？不如等功夫茶同大家講一個古仔。冇耐之前通車嘅昂船洲大橋，一直吹噓話係全球最長斜拉橋，點不知，由於工程延誤咗一年，到咗完工嘅時候，即刻淪為世界第二，事關較早通車嘅江蘇省蘇通大橋後來居上，比昂船洲大橋長咗七十米。呢個古仔嘅教訓就係，理得你吹水吹到天花龍鳳，如果缺乏工作效率，領先都會變成落後。

同樣道理，就當你啟德郵輪碼頭目前嘅設計係冠絕全球，到咗二○一三年又會點呢？如果工程延誤又點計數？所以話啫，認叻認第一係冇鬼用嘅，埋頭苦幹最實際。

就好似香港入境旅行社協會主席侯叔祺咁講吖，政府聲稱希望將碼頭發展為內地赴台灣一程多站郵輪嘅母港，但係二○一三年先至得一個泊位咁大把，唔能夠容納更多巨型郵輪，競爭上好蝕底。

侯叔祺又話，新加坡係香港最大競爭對手，港府要做好宣傳工作，而且收費要有吸引力先至可以令到歐美客戶改用香港郵輪碼頭服務，現階段自誇郵輪中心係言之尚早。

一句講晒，龜兔賽跑，驕兵必敗，曾蔭權政府假如沉醉喺冠絕全球嘅春秋大夢，瓜得！