本文重點
工展會係香港廠家每年嘅重頭活動，作為中華廠商聯合會永遠名譽會長嘅全國政協常委楊孫西，尋日就親自帶隊到維園工展會購物消費，為一眾廠商打氣。
楊孫西先用二千元買咗十盒生麵禮盒送贈隨行嘅黨友，再到東華三院攤檔捐出一千元做善事，黨友每人獲機構贈送一個毛公仔，未到平安夜就收到聖誕禮物，個個開開心心。
黃定光邊買邊食
尋日專責展覽活動嘅廠商會副會長施榮懷負責做導遊，同楊孫西一行人齊齊行工展會，可能受到楊孫西感染，象哥黃定光自己都買埋一份，除咗買多盒二百元嘅生麵禮盒外，行到一間酒家攤檔時，又買咗二百元即食帶子及四十元豬手，即場與黨友分享，個個食到舔舔脷，大家合共消費約四至五千元，出錢出力支持工展會。
施榮懷憶述話，佢喺七、八歲已經跟爸爸施子清一齊行工展會，當時都有高科技產品賣，大家估吓係乜？就係「人造皮」嘞，當然呢個時代唔係咁流行喇。
整個行程仲有一段小插曲，話說楊孫西走進會場時，已察覺到條通道較以前狹窄，作為世姪嘅施榮懷承認，條路窄咗係希望擺多啲攤檔，印證搞咗十幾年工展會嘅楊孫西果然經驗老到，不愧係廠商會嘅元老級人馬！