13/12/2009

播放本新聞相關短片

政情:胡幗英帶四川童遊迪園

香港名媛成日畀人覺得係大花筒,其實不乏善心人,好似資深投資者胡幗英長居英國多年,近年「回流」返港,連帶善款亦一同回流。最近佢全力捐助慈善團體《站起來》,上周二(八日)仲陪同由四川來港嘅五位受惠者暢遊香港迪士尼樂園,同行仲有殘奧運動會輪椅劍擊金牌得主余翠怡,余翠怡原來係該會慈善大使,胡幗英出錢又出力,陪佢哋睇巡遊又玩小小世界,年紀最小、只有十三歲嘅小女孩魏雲露話,家鄉啲同學個個都託佢買手信,最想買迪士尼嘅米奇公仔喎!

《站起來》原來係由胡幗英老友、威爾斯親王醫院骨科主管陳啟明所發起,專為去年5.12汶川大地震災後接受截肢嘅傷患者提供全面康復計劃,胡幗英話自己細個時都發生過意外,大腿骨折斷,住咗一個月醫院,之後花了好長時間做物理治療先好番,而佢十八歲嘅女兒咁啱細個時又跌斷過手臂骨,做咗一次大手術,呢啲經歷,令佢深切感受到地震傷患者所受嘅傷害,所以今年七月佢親自到四川與受惠者接觸,令她感受更深,佢話女兒都好想同行,仲話好想留低為慈善團體出力。