食物及衞生局局長周一嶽任內幾乎「每周一鑊」，搞到本港醫療系統瀕臨爆煲，醫學界一直對佢敢怒不敢言，有政圈中人爆料，話周一鑊非但冇做好佢份工，反而成日出席活動，疑似要人半推半邀請佢唱歌，畀機會佢出風頭，狠批佢留低只會影響新班子嘅形象，畀佢佗衰晒。
候任特首梁振英（CY）正籌組新班子，周一鑊率先開腔明示暗示想留低，但據聞此語一出即時引起業界嘅激烈反彈說「不」，有接近梁營中人更加暗示，周一鑊留低嘅機會並唔高，反而估計前醫管局高層高永文同特首辦主任梁卓偉係可以考慮嘅人選。
事實上，周一鑊早前都聞到（火羅）味，喺CY主動「喝停」明年私家醫院雙非孕婦分娩配額後即時跪低補鑊想博留低。
如果周一鑊可以留低，代表千千萬萬市民心聲嘅東方報業集團一定表示不滿，留佢喺度簡直佗衰晒成個新政府嘅管治威信，呢件事點可以畀佢發生！