香港足球隊締造歷史，喺東亞運足球決賽憑互射十二碼力挫日本，奪得香港首個大型綜合運動會足球項目冠軍。東亞運籌委會主席霍震霆尋日帶埋囝囝啟剛同啟山入場睇比賽，身兼香港東亞運代表團副團長嘅啟剛見到港隊奪冠，即時開心得豎起手指公滿場飛。
不過，賽事期間，霍震霆就多次發生「開口中」怪事，話說佢上半場接受傳媒訪問時，心情大好咁話港隊難得打入決賽，坐亞望冠，點知話口未完，日本隊旋即射入第一球，全場嘩然，訪問中嘅霍震霆亦目瞪口呆，神色凝重起來。
到咗下半場，港隊開首依然落後一比零，呢個時候，霍震霆又一次喺傳媒面前經過，同大家講希望下半場港隊會創造奇迹。兩分鐘後，霍震霆又一次開口中，港隊陳肇麒一個頭槌破網，港隊最後更勢如破竹，成功奪冠。霍震霆頒獎時，終可將金牌掛在港人頸上，應該係佢搞東亞運以來最開心嘅一刻！
卓妮