話說Kenneth嘅大仔就讀嗰間國際學校今年慶祝四十周年校慶，Kenneth讀緊中一嘅大仔竟然喺教育局嘅網頁，發現間學校係一九七○年註冊，計盡都係得卅九周年。大仔多番同Kenneth講呢個問題，希望佢同校長反映，但Kenneth都冇理佢。

囝囝深深不忿，決定直接走去同校長講清楚。校長翻查文件，至發現原來當年學校註冊需時一年，所以教育局方面嘅資料的確係遲咗一年，至搞出呢個誤會。校長非常欣賞Kenneth囝囝唔盲目相信他人，有求知嘅精神，仲特登喺校報上表揚佢添。

Kenneth話故事令佢明白到年輕人有獨立思考，所以喺驗毒呢單嘢上，佢會更加尊重年輕人唔同嘅聲音咁話。講到尾，都係似Kenneth兜個圈讚自己囝囝多啲！