政情：鍾樹根當港大校董 網民擔心
立法會每屆都會投票選出十位議員出任慈善團體顧問局及大學校董，民建聯陳克勤上屆當選後爆出一句「搓 our breast」後出任中大校董，結果被中大一眾師生鬧爆佢英文差就唔好學人做校董。今屆由於唔少資深議員講明棄選，令多名新丁議員成功當選大學校董，當中最矚目嘅莫過於自動當選香港大學校董、曾鬧出卡片串錯字風波嘅民建聯鍾樹根（Christopher）。
葛珮帆接克勤棒
之前我哋發現Christopher派發嘅新卡片錯字百出，將中華人民共和國英文名譯咗做「the People's Republic of Hong Kong」，隨即畀人寸佢擬搞港獨之餘，仲要笑佢啲英文極之水皮，今次佢仲要做埋港大校董，結果又惹來網民議論紛紛，擔心佢睇唔明港大校董會嘅英文開會文件。至於克勤嘅中大校董位就讓咗畀黨友葛珮帆（EQ），希望EQ都醒醒定定，唔好搞出啲咩風波啦。
其餘兩位中大校董包括自由黨張宇人及新民主同盟范國威，人民力量陳志全就因不敵范國威而落敗。至於其他港大校董除咗Christopher外，仲有經民聯石禮謙、謝偉俊、民主黨涂謹申同教協葉建源擔任。