一向吸引城中名人幫襯嘅富聲魚翅海鮮酒家，位於銅鑼灣怡和街嘅分店尋日開幕，卓妮都去咗湊熱鬧。酒家老闆盧振聲（Sammy）嘅伯爺盧德光，與彤叔分屬順德同鄉與老友，所以彤叔畀面出席剪綵。剪綵之後，卓妮見彤叔與盧德光傾得好投契，原來傾緊大家手上同一款嘅海鷗牌真金陀飛輪手錶。

盧德光手上戴住嘅海鷗牌真金陀飛輪手錶，原來係幾年前鄭裕彤送贈嘅。

鄭裕彤（中）出席「富聲」魚翅海鮮酒家開幕，與老闆盧振聲（左三）及家人來張大合照，右三為盧振聲爸爸盧德光。 （徐家浩攝）

真金打造 餽贈老友

盧德光同卓妮講，隻「國寶」海鷗錶係彤叔幾年前送贈給他，用真金打造，戴落都幾墜手吓，當年售價都要二十萬元，現在有否升值就唔知嘞！彤叔幾年前已經睇上海鷗錶，咁啱Adrian去年展開收購，莫非彤叔戴過覺得好之後提議Adrian去馬？抑或兩爺孫心有靈犀呢？

雖然海鷗牌陀飛輪係國產，但價錢都唔平，售價由幾萬元至三十多萬元不等，但相比歷史悠久瑞士名錶品牌已平一大截。單陀飛輪機械錶嘅每日誤差在負十秒至正二十秒之內，雙陀飛輪機械錶嘅誤差仲會小一啲。

講番富聲酒家，話說盧德光在上環開設海味店生意，主要銷售鮑參翅肚和冬蟲草，兒子Sammy由細對海味對到大，眼見咁多極品食材，於是五年前在灣仔駱克道創辦富聲魚翅海鮮酒家，尋日再下一城開多間。周汶錡（Kathy）尋日已經係第二次為富聲剪綵，她笑言除了酬勞加碼外，還有免費鮑魚，事關老闆Sammy五年前請她為灣仔駱克道總店剪綵後，覺得她腳頭好，所以今次再請她剪綵喎。

卓妮