明白醫學院需要

梁卓偉尋日上電台，解釋政府就工廈變骨灰龕嘅諗法做緊嘅工作，當被問到過身後會點處置自己嘅遺體，佢毫不猶豫話，自己一直喺醫學院度做，年幾前先做咗依家呢份工，所以好明白醫學院有搵遺體做研究同畀學生學習嘅需要，因此希望過世後遺體可做呢啲用途，幫得到佢哋喎。

講番工廈改建骨灰龕措施，梁卓偉自己都覺得唔應該由一、兩個區照顧晒全港嘅靈位需要，話咁係唔公平同負荷唔到，所以過去四、五年，佢哋都同過五、六個區議會傾過，暫時只係得和合石橋路可落實提供約四萬個骨灰位，所以依家佢哋有兩個問題需要處理，其中一個就係當區居民嘅睇法同地理位置許唔許可，其次就係部分商業同商貿用地，可唔可以轉變土地用途，所以仲要同規劃署、地政處研究。