政情：女童軍首次爭莊
早排搞到滿城風雨嘅香港女童軍總會，超齡嘅現任總監邊陳之娟已確定明年四月卸任，而新一屆香港總監選舉將喺明年一月舉行。據知，提名期過後，總會共收到兩項有效提名，即係已經為女童軍總會締造咗歷史，因為女童軍總會有史以來，喺選總監嘅時候總係得一人提名自動當選，今次係第一次喺選總監嘅時候需要角逐，可以講女童軍總會喺民主方面邁進咗一大步。
彭徐美雲Vs李周美枝
兩位參加角逐嘅候選人，分別係該會嘅副總監彭徐美雲同名譽副會長李周美枝，兩人嘅來頭一啲都唔細，好似彭徐美雲咁，佢老公彭曉明係現任公益金名譽副會長，兩夫婦都曾經留學美國，以製衣起家，亦都同樣熱心公益活動。彭太平日活躍社交界，而且百足咁多爪，同時身兼國際婦女會主席、港區婦聯代表聯誼會副會長、香港青年獎勵計劃理事會委員，以及九龍社團聯會名譽顧問等職位，真係聽到都覺得佢忙。消息透露，彭太加入女童軍總會五年左右，雖然唔算好長時間，但就好積極參加活動，加上同內地政商界關係密切，知名度同當選呼聲一啲都唔低。
至於另一位候選人李周美枝，係東華三院前主席李三元嘅太太，加入女童軍總會已經廿年，絕對係資深成員之一。除咗女童軍總會外，李太仲係香港各界婦女協進會嘅名譽副會長，佢平日行事相當低調，甚少單拖出席社交活動，大部分都係陪老公應酬。李三元家族經營皮革生意，據知李太冇份參與業務，一直都只係專心相夫教子。
今次既然係女童軍總會香港總監有選舉以來第一次「爭莊」，所有候選人都冇拉票經驗，不過據悉兩位候選人近日已經開始選舉工程，密密約啲會務委員會裏面有投票權嘅成員傾偈講解參選理念。第一次選舉，難怪會咁緊張，加上要收拾上任總監邊陳之娟留低嘅局面，新一任香港總監可以話任重道遠。
女童軍總會名譽副會長蔡關穎琴被傳有心角逐總監，但佢同我哋講，佢短期內唔考慮接手總會工作，事關佢老公中華總商會會長蔡冠深連任會長，佢哋已有共識，蔡太將花多些時間照顧家人。