Jeffrey同Andrew向我哋介紹呢位新成員，我哋初時以為佢哋講笑，問清楚後知道珍珠無咁真，盧文端已經正式加盟，大家講心，連交會費同申請表呢啲繁文縟節都慳番。「盧」嘅英文都係「Ｌ」行頭，經濟動力之內嘅「Ｌ」字輩又添一名成員。Andrew話，來自工商界嘅盧文端可以將商界意見帶入經濟動力，集思廣益，而盧嘅兒子盧金榮同女婿都係年輕人，都啱晒經濟動力嘅口味。經濟動力為大學生辦名人講座，已經舉行咗三場，聽聞佢哋最近情商到新鴻基地產副主席郭炳江開金口，日期待定。

Andrew自爆熱愛高球，周末或周日清晨未到六點就起身，六點半由屋企出發去打波，有時去粉嶺，有時就去深西麗打，去粉嶺坐半粒鐘車就到，打完返到屋企都係十點鐘，老婆先啱啱瞓醒，家庭日由此開始。好多人呻時間唔夠使，真係要跟Andrew學兩招！