強調好處 只得一招

林鄭尋日出席香港工業總會午餐會，開場白就賣口乖，話雖然唔係第一次推銷新措施，但就最重視就係尋日呢個聚會。佢親自主講不特止，仲首次安排發展機遇辦事處主任連同地政總署、屋宇署、規劃署三大部門嘅署長級人馬，喺午餐會後主持座談會繼續解畫，連簡介投影片都係新鮮出爐，搞到立法會議員梁君彥都講笑話，內容仲詳細過同立法會開會。

林鄭嘅簡報全長超過半粒鐘，內容猛咁強調活化工廈有乜好處，但解釋政府其實講嚟講去得一招，就係唔收錢，要將未統一意向更改用途嘅工廈納入計劃就有難度，反建議業界用創意方案解決混合用途問題，例如可以互換單位，將工業用途集中喺決定唔改用途嘅工廈，以免趕絕工業。

語出驚人 全場愕然

林鄭講到呢度，突然爆一句：「希望大家唔好上街搵我投訴！」全場為之愕然，林鄭月娥就好爽直咁接住話：「係呀，我好現實㗎！如果推咗政策，仲日日有人上門搵我就唔好啦！」唔知林鄭月娥係咪見呢期每逢假日禮賓府同政府總部都咁熱鬧，放眼望去都係反煲呔曾嘅標語同橫額，先至突然有感而發呢？

活化工廈新措施畀人話明益發展商，林鄭再度撇清關係，反指大發展商持有嘅工廈唔多，有都一早補晒地價發展咗，依家應該係揼心同詛咒緊佢先啱，又話希望第一、二個活化工廈嘅成功例子唔係由大發展商做到，仲要有工廈嘅地區，區區都有成功例子，咁就唔使畀區議會捉住佢嚟問喎。

林鄭月娥係「好打得」局長，有名畀你叫，但係佢竟然仲「好踩得」，煲呔曾咁小器，唔知有冇畀林鄭激親呢？