回歸後貧窮人口有加無減，面對人口老化衍生的問題，煲呔曾不過是輕輕落墨，卻在無關痛癢的慳電膽上興風作浪，終搞到船沉自己嘔白泡，民望插水，拖累政府整體管治威信。老朽但知「通識」有所謂「失敗國家指數」，今煲呔曾的施政得分創新低，要是有「失敗施政指數」，以煲呔曾近期負面新聞之多，相信指數必爆燈。

老朽一介布衣，加上一把年紀，此生已無緣打政府工，夜來睡不着，只能輕吟「山寺日高僧未起，算來名利不如閒」，既是「閒人」而非「貴人」，自是無緣支持煲呔曾的「佛都有火」，不過，見佢話「決策都是以公眾利益為先」，如今畀慳電膽玩死，則始料不及。

世事難料，一隻曱甴都可玩死一家公司：話說二十世紀八十年代初，日本有家雨鞋公司，從各地推銷員收集到的需求數據，將這些訊息輸入電腦處理，計算出要生產五百萬雙雨鞋才能滿足市場需求。於是公司日夜加班生產，然而，整個雨季只賣出百分之二十的雨鞋，百分之八十滯銷，公司最終破產。後來查實，竟是一隻曱甴爬進了電腦，攪亂了線路而引起故障，從而得出生產五百萬雙雨鞋的錯誤數據。

一隻曱甴拖垮一間公司，一隻燈膽搞到煲呔曾民望插水。老朽只能借「大失莫逾亡也，身存則無失焉」安慰煲呔曾。誠然，只要活着就不是真正的失去。