社民連立法會議員梁國雄前日在特首答問大會期間，因違反議事規則被主席逐出會議廳，糾纏間累及一名保安員受傷。立法會秘書長吳文華尋日在立法會內務委員會上報告話，嗰個保安員傷勢嚴重，包括撞傷腰部、韌帶移位、手部皮肉被扯甩，經治療後醫生指示要休息五日，下周一再覆診，她對此表示難過遺憾。
立法會秘書處已聯同議員致送一張幾乎半個人咁高嘅巨型慰問卡畀受傷保安員，下周會同保安組開會，聽取保安員執勤時遇到嘅困難同心聲，然後將意見交由行政管理委員會處理。工聯會王國興尋日喺會上話極度關注保安員人身安全，仲質疑主席當日點解無即時報警處理，讓有關保安員報工傷，反映情況愈來愈嚴重，必須嚴肅處理。
除咗社民連三子外，廿名泛民議員尋日都就事件發表聲明，但繼續護短，只輕描淡寫話期望以後唔會再有類似事件發生，完全無提點處理問題；而社民連尋晚更振振有辭話，保安員將梁國雄強行拖出立法會，因通道狹窄，發生意外無可避免，不但要求主席為保安員受傷負責，更指摘白鴿黨張文光對社民連抗議行動作出不合理批評，咁嘅行為正確與否，社會自有公論。