泛民玩嘢冇隊形

班泛民主派議員之前係威係勢，預告如果煲呔曾喺尋日宣讀嘅施政報告對政改問題交白卷，佢哋就會齊齊搞嘢「玩鋪勁」，包括考慮集體離場抗議，點知最後又係雷聲大、雨點小，集體離場變咗集體舉牌示威，級數當堂差咗幾皮。三名社民連成員則自行喧嘩掟嘢博畀主席趕離場，令到整個泛民散晒。

泛民自亂陣腳行動「降呢」，煲呔曾沾沾自喜，好快又忍唔住爆肚窒人，聲稱其中一句英文標語「BOW TIE KEEP YOUR ELECTION PROMISE 」（煲呔曾你要遵守選舉承諾）文法出錯，應該用「KEEPS」先啱、即係喺「KEEP」後面加個「Ｓ」。不過會後多名出名英文好嘅議員，都話出錯嘅其實係煲呔曾，質疑佢心魔作祟、自暴其短。

我哋分別問過兩名資深英文科老師，佢哋都一致認為原句子嚴格嚟講的確有啲瑕疵，應該喺「BOW TIE」個主詞後面加番個逗號，不過以口號嚟講亦算可以接受，反而煲呔曾嘅改法就有明顯嘅大錯，加個「Ｓ」後成句句子都唔知講乜，考英語基準試肯定肥佬。

其實煲呔曾咬文嚼字自暴其短嘅，又點只呢一單？佢尋日喺記者會硬銷佢任內三份施政報告，主題都有個「新」字，以凸顯政府需要有新思維同創意，但旋即被踢爆佢今年份報告毫無新意。大家又質疑政府點解唔派糖，佢就辯稱施政報告向來都唔係派糖嘅場合，完全忘記晒兩年前佢搶過預算案風頭，偷步宣布減稅派糖嘅事件。煲呔曾尋日嘅表現再次證明，佢唔止自作聰明、自暴其短，仲經常自摑嘴巴，同無晒隊形嘅泛民，都係五十步笑百步！