CY梁振英近年放下身段，無論係社會政事、地震海嘯、o靚模文化，佢都唔介意口水多過茶同大家分享佢嘅意見同睇法，不過講到近期熱門的甘威「有好感」事件，佢就一句都無搭訕。CY嘅反應證明佢凡事分輕重，評論時事小心揀題目，好明白有啲嘢唔玩得。
CY尋日去香港盲人輔導會總部出席「青光眼No Way」公眾教育及免費青光眼篩查活動新聞發布會，仲粉墨登場即時驗眼。CY視力一百個巴仙正常，仲測得出佢無周圍望兼目不斜視，事緣驗眼時眼珠不能四圍碌，要眼定定向前望至測得準確，個視力報告指CY喺呢方面做得好好，佢仲乖乖咁無亂襟個測試掣。
不過聽到記者問起甘威「有好感」事件，CY嘅第一個反應係忍唔住好有信心咁笑，向來鍾意發表意見嘅CY，今次居然忍得住一句都唔講。可能佢認為呢個問題答乜都唔多好，會令人覺得佢太輕佻、太八卦、太道貌岸然，得失男人或者女人都唔好，總之，忽然嚴肅起嚟，一定有佢嘅道理。