海洋公園早前被投訴冇每日清洗哈囉喂演員戲服，搞到佢哋個身一陣臭汗味，遊客聞到鬼都怕。好彩海洋公園喺主席盛智文管理之下反應夠快，第一時間檢討，仲向一間廚具家居用品公司訂購一批臭氧消毒機。聽講部機聲稱可以喺幾分鐘內殺死衣物上百分之九十九嘅細菌，兼有辟味功效，所以大家喺海洋公園見到鬼，都唔使再走鬼嘞。不過呢批機價錢唔平，每部要三千幾蚊，可見海洋公園真係有決心擺脫污糟鬼形象。
海洋公園主席扮嘢文亦不忘力撐公園，佢話啲戲服不知幾衞生，佢試過大熱天時化晒妝着住戲服，等出場嗰陣已經熱到啲汗由頭濕到落腳，嗰種辛苦法的確不足為外人道，但每次演出後，演員穿着嘅衣服內層一定會洗乾淨，即使有啲戲服外層質地不宜清洗，都會徹底消毒。
扮嘢文為海洋公園扮咗咁多年嘢，戲服衞唔衞生佢應該最清楚，絕對有資格講呢番說話。佢話公園購入消毒機，都係行多一步，做多少少嘢令大家安心，又可改善問題，何樂而不為！