孫公年過六旬，加上工作繁忙，「釣魚」都唔係稀奇事，但尋日下午直接資助學校議會跟教育局合辦一個中學生歌舞表演慶祝十‧一節目，特別表演嘉賓香港中樂團表演咗一場打鼓，近十個團員一人一個大鼓，雷鼓聲震撼全場，但作為主人家嘅孫公，喺台下有理無理一樣瞓得咁甜，遠睇仲以為陶醉於鼓樂之中添，連坐喺旁邊嘅一眾匯演籌委會校長，都唔敢擾佢清夢，睇嚟孫公真係好累喎。

可惜在場嘅攝影記者對孫公嘅睡相極有興趣，鎂光燈閃呀閃，閃到瞓咗兩次、每次只係三、四分鐘嘅孫公都醒番，「好夢難圓」，當佢知道畀人影相後，就即刻坐番直，唔敢再瞓。

其實個表演長達三個半鐘頭，孫公都睇咗一半先離開，加上香港華仁書院管樂團都有份表演，作為華仁舊生嘅孫公，專登睇埋師弟表演先走，都算畀足面。