著名漫畫家臼井儀人登山失足墮崖過身，佢嘅代表作《蠟筆小新》頓成絕響，令一眾小新迷傷心不已。噩耗傳出，小新迷已經開始搶購《蠟筆小新》系列產品，同樣係小新迷嘅立法會保險界議員陳健波就選擇摷番封塵多年嘅《蠟筆小新》錄影帶出嚟重溫，緬懷一番。
陳健波平時咁正經，點都唔似會鍾意睇呢類無厘頭搞笑漫畫喎。佢笑言，大約十年前，電視熱播《蠟筆小新》卡通片，當時佢讀緊小學嘅大仔集集都追看，睇親都「騎騎笑」，佢原先因為好奇個仔笑啲乜而睇埋一份，點知一睇就欲罷不能。陳健波覺得小新人細鬼大又奀皮，爸爸野原廣志夠鬼馬，睇睇吓除咗好笑外，有時仲感同身受添。
《蠟筆小新》係透過一個五歲幼稚園學生野原新之助嘅童言童語嚟諷刺社會時弊，不過有唔少人批評部漫畫有好多色情橋段，意識不良，陳健波唔擔心囝囝會學壞？陳健波力撐小新講嘅係笑料，內容唔算三級，而且覺得小朋友如果真係想睇，總會有渠道睇到，所以佢喺一邊「導賞」反而安心。