喂喂喂，咪住先，人大唔係已經扑咗錘咩？二○一七年普選特首吖嘛，最快二○二○年普選立法會吖嘛，有晒時間表，泛民主派到底想點呢？唔通想一步登天？定係無事生非搞搞震？

計功夫茶話齋，以泛民政客唯恐天下不亂嘅性格推測，梗係存心搞破壞啦。有啲人好得意o架，唔想人哋富貴，只望對方閉翳。如果你話畀佢聽，今晚八點開飯，佢會話，唔得，一定要七點，否則我反枱！如果你順應要求，佢又會話，唔得，一定要六點，否則我爆樽！如果你再一次順應要求，佢更加會得寸進尺，唔得，一定要即刻開飯，否則我殺你全家！

回歸十二年，亂足十二年，點解呀？泛民政客不斷撩交嗌囉，前一份政改方案推出，泛民議員唔理三七二十一，綑綁式集體反枱，一嘢否決，搞到香港民主進程原地踏步。你以為呢班友仔真心誠意追求民主理想？唔好天真唔好傻。

講番所謂五區總辭吖，先唔理係咪無聊，醞釀過程其實相當獨裁。公民黨整咗一張總辭名單，好有型咁樣調兵遣將，茂里甲你去辭職啦，茂里乙你去辭職啦，茂里丙你去辭職啦……一點到民協嘅馮檢基，基哥反應好大，即時成個彈起，乜話？你事前又冇問過我，失驚無神老點我去辭職？好唔尊重啫！更加匪夷所思嘅係，公民黨話喎，事前冇問過當事人，完全冇問題。

唉，諗諗吓，泛民咁鍾意玩嘢搞破壞，其中一個原因可能同佢哋一把年紀有關。譬如最拿手做漢奸嘅民主阿伯李柱銘，家陣七十出頭，超過古稀之年，唔知等唔等得切二○一七年普選特首，更加唔知有冇希望見到二○二○年普選立法會。所以佢哋咪心急囉，咪盡地一煲囉，非要搞到香港沉淪不罷休。之不過咁，其實唔使咁心急嘅，功夫茶應承李漢奸，如果有生之年真係見唔到普選，二○一七年會燒一份「新聞衣紙」畀閣下過目。

睇番隔籬埠澳門吖，回歸冇十二年，只係十年，社會發展比香港後發先至，人均生產總值同埋旅客人數都贏咗香港，靠嘅係乜呀？咪就係真真正正嘅強政勵治囉，澳門冇人搞破壞，施政冇人拖後腿，更加冇人心存不軌製造憲政危機。

香港已經夠煩夠亂，再係咁落去，一國兩制遲早變咗一拍兩散。如果係咁就大開眼界嘞，歷史學家可能會咁樣記載：此災只應地獄有，人間哪得幾回聞！