由自由黨分裂出嚟、前稱「3L」嘅立法會議員林健鋒、梁君彥同梁劉柔芬，雖然盛傳有政府喺背後力撐，但三人經過大半年尋尋覓覓，都搵唔到其他立法會議員加盟，只有鄉議局主席劉皇發答應擔任顧問，其他非立法會議員嘅成員，唔少都係來自前自由黨，以及「3L」一向代表開嘅總商會、工總同紡織製衣界，組班行動就稱唔上係失敗，亦絕對唔算成功。

雖然經濟動力講明主打工商經濟，唔會學自由黨咁畀地區直選利益牽住鼻子走，但要成為一個真正有實力嘅政團，點都唔可以一啲地區影響力都冇。然而佢哋現有從自由黨挖角得嚟嘅兩名區議員羅煌楓同李漢城，都係來自工商界嘅委任議員，缺乏直選經驗同地區實力，其他成員亦冇搞開呢啲嘢，由頭重新做起要好多時間，惟有又要用番以前自由黨嗰套羅致現成區議員嘅策略。

短期政治利益 難穩固地區實力

根據我哋明查暗訪，經濟動力由發叔出馬，已先後游說過多名現任區議員加盟，直選同委任嘅都有，大部分都有工商同專業背景，包括本身係律師嘅資深沙田區議員簡松年，以及以前都畀自由黨以同一手法羅致嘅中西區區議會主席陳特楚、元朗區議員袁敏兒等，不過暫時都未聽聞有人答應。

當中有人質疑經濟動力喺地區嘅知名度不足，立場亦太過親政府同親工商，對佢哋嘅地區工作同選情冇乜幫助。有前自由黨成員更指出，「收購」區議員純粹基於短期嘅政治利益，雙方關係好難持久，無助一個政團建立穩固嘅地區實力，連自由黨都已經明白行唔通，近年都好少再用，經濟動力又走番呢條舊路，有冇前途都好明顯喇。