「明月幾時有？把酒問青天。」蘇軾嘅《水調歌頭》名震千古，前工商及科技局局長王永平尋日出席一個電台活動，由自爆最喜歡鄧麗君嘅《但願人長久》，講到鍾意蘇軾詞境嘅豁達，仲叫打政府工嘅一定要讀蘇軾嘅詞。蘇軾寫《水調歌頭》時因正值政途失意，因得罪王安石而被貶謫，○七年被煲呔曾「叮走」嘅平叔，叫前同僚留意東坡詞作，除咗勸人豁達之外，唔通佢仲另有所指？
蘇軾詞境深遠，平叔月旦時事同樣言簡意賅，尋日大彈政府醞釀中嘅強制驗毒計劃，指爭議好大，唔明點解政府係都要搞，又話唔明十二月推出嘅大埔校本驗毒計劃，點解唔喺官校推行，起碼執行都易啲啦，平叔愈彈愈有勁，爭在無搬出佢嘅名言：「Stupid！」
鬧還鬧，平叔過番兩招畀班前同僚，指港府應盡快召開高峰會，全方位諮詢，又話抗毒係漫長而複雜嘅戰爭，係巨大社會工程，政府切忌急功近利，應該畀全民參與，但係佢就完全感覺唔到政府有做到囉，言下之意，即係暗寸港府急功近利喇！