劉慧卿去年爆冷當選財委會主席，有人分析係因新入立法會嘅一批獨立建制派議員，想借機向西環同煲呔曾顯示實力，先至會集體倒戈。但亦有人指出，上次已經係劉慧卿第三次爆冷，顯示建制派內有啲人係因為其他理由而支持劉慧卿，包括真係覺得佢做得唔差、同佢有個人交情、以及唔鍾意過去挑戰劉慧卿嘅建制派人選等。如果建制派唔係純粹想表態抗議，而係真正想撼低劉慧卿，一定要搵番個人緣好、資歷同實力亦有番咁上下嘅人選。

建制陣營內夠資歷挑戰劉慧卿嘅，大部分都已有要務在身，好難分身兼顧財委會嘅繁重工作。唯一得閒啲嘅係即將卸任資訊科技事務委員會主席嘅梁君彥，以及喺再下一個年度先接手做發展事務委員會主席嘅劉秀成。

不過梁君彥喺建制派內部嘅人緣只屬一般，尤其係唔知自由黨會唔會撐佢。劉秀成依家係財委會副主席，同不同黨派嘅關係都幾好，不過亦有建制派質疑佢主持會議嘅能力麻麻，擔心會變成「翻版呂明華」成日畀泛民玩殘，最終受害嘅只會係建制派同政府。如果建制派夾硬派兩人出戰，分分鐘又會輸多次。

唔放劉秀成在眼內

有建制派甚至建議既往不咎，搵番上年支持過劉慧卿嘅獨立議員出戰，咁就唔使擔心再有人倒戈，其中一個人選係會計界嘅陳茂波（阿Paul）。不過阿Paul就同我哋澄清，至今都冇人搵過佢，即使有人搵亦唔會考慮，因為佢一早安排好多工作，而且佢個人覺得劉慧卿做得唔錯，睇唔到有必要換人。

劉慧卿尋日同傳媒事先張揚已有唔少建制派議員話會支持佢連任，又公開鼓勵劉秀成出嚟同佢選過，擺明唔放對方在眼內。佢又自爆財委會嘅對口官員財經事務及庫務局副秘書長甯漢豪係佢中學師妹，同佢合作得好好。睇嚟建制派就算公開刊登尋人廣告，最終都係煲冇米粥。