香濃又滑溜嘅絲襪奶茶係香港特色，朝早歎一杯，三魂七魄即歸位。尋日會展美食博覽搞咗個金茶王比賽，搵咗自由黨副主席方剛、機管局行政總裁許漢忠和商務及經濟發展局副局長蘇錦樑（Greg）做評判，原來三人都係奶茶迷，一日一杯無走雞，但口味就各有不同，好似多奶少糖、茶味要夠濃咁，總之飲奶茶飲得好講究。
近期致力推銷消費券嘅方剛，要求茶味要夠濃，其次係多奶少糖，最啱心水就係檀島和翠華餐廳嘅奶茶。方剛話好奇怪，每逢飲奶茶自然會想起蛋撻，兩者一拍即合，成為情侶。阿Greg飲奶茶同方剛一樣鍾意多奶，但濃度就要睇幾時飲，每日下午六點前可以飲濃啲，但六點後就要淡，因為擔心影響晚間睡眠。至於許漢忠飲奶茶就無乜特別喜好，茶靚就得嘞。
卓妮尋日講過阿Greg二仔志永（Brendon）上月在英國利物浦大學醫科畢業，做醫生懸壺濟世，咁啱尋日講開飲茶，於是就問阿Greg幾時有得飲新抱茶，佢好巧妙回答話：「飲茶最緊要焗得透，所以杯新抱茶都要順其自然，焗到適當時候就一定飲得到。」估唔到平時咁嚴肅嘅阿Greg都識講笑喎！