呢個世界，人人生而平等，只要你活學活用一啲金句，咁你就可出污泥而不染，做任何事都「問心無愧」！老婆傳緋聞，個身唔喺我度，只要丈夫相信佢個心喺自己度，咁就安枕無憂照發春夢；反之亦然，男人偷腥，只要有顆顧家的心，豪宅裏的那張雙人床，同床異夢有乜問題啫！妓女堅守賣身不講心不出賣靈魂，畀鬼壓過一樣「質本潔來還潔去」，咁就死都贏得誠信高過官員喇！

康文署點收孫中山文物，唔見二十一件，卻忽然又較清單多出四百多件，真係神奇過某些o靚模的「變幻球」，時細時大；康文署無端端發達，唔單止冇愧對孫中山，還可以大大聲話：「我疏忽，唔代表有損失！我認衰，唔代表畀鬼追！」

校園驗毒試行計劃，被轟倉卒上馬冇配套，未推行反對聲浪已如海嘯山崩，在氣勢上政府輸了九成九，智者不為也！當然，政府可以話：不想學生毒海浮沉，愛得太深，救得太遲；驗尿，從宏觀角度看，是愛的表現！（旁白響起：傻癡癡，傻癡癡，政府不想見學生變毒蜘蛛，投下更多人力資源，從一篤尿開始！你的人生不會極速玩完！）

這樣子驗尿，自然不會予人「強制驗毒的暴力」，相反，從一篤尿開始，令人感受到政府的溫柔！o靚模也懂得活學活用的道理，政府啲高薪化妝師做吓嘢啦！