中環出更：姚思榮組隊搶孤拖蔣麗芸落水
盂蘭勝會係國家級非物質文化遺產，繼早兩年「盂蘭文化節」大受歡迎後，今年香港潮屬社團總會（總會）將續辦「2017盂蘭文化節」，其中重頭戲之一嘅搶孤競賽，立法會議員姚思榮同柯創盛都會參加，佢哋仲同卓妮講話想搵埋女議員參加，打算叫埋蔣麗芸一齊搶孤喎。
今年嘅盂蘭文化節將於九月一日至三日喺維多利亞公園舉辦，其中親子盆供堆疊賽及搶孤競賽分別喺九月二日及三日進行，屆時將邀請學生同公眾人士組隊參與。兩年前參與過第一屆搶孤嘅姚思榮今年再接再厲，拉埋一班議員一齊參賽。由於佢哋將決戰冠軍隊伍，姚思榮話要提早一個鐘練習，又指搶孤同踢波一樣分前中後位置。柯創盛就笑言身形高嘅好似立法會議員何俊賢同陸頌雄咁就企後面，唔使拗晒腰，而佢同姚思榮企前面就方便靈活走位。
總會主席陳幼南、活動總统籌胡炎松、總會會董林月萍及李嘉莉都有現身活動發布會。胡炎松透露目前約有二十七隊隊伍過百人報名參加搶孤競賽，又話比賽設有評判，如果犯規就好似踢足球賽咁，畀黃牌佢。
增設「祈福香港」 派平安米袋
今年盂蘭文化節更增設「祈福香港」活動，讓市民踏入許願區祈福兼獲贈平安米袋。大會準備咗三千個米袋派發，每日一千個，分時段每個鐘派一百個，派完即止，預期入場人次達十萬人。
會場亦設盂蘭水墨畫展覽，水墨畫工作坊同3D主題拍攝區等，香港風水畫藝會會長袁志明話今次展出十幅作品，以盂蘭節及「目連救母」嘅故事為題，特地以較年輕筆觸繪畫，睇上去好有漫畫嘅生動風格。
卓妮