香港迪士尼行政總裁金民豪去年八月尾上任做新老總後，喺一片爭議聲中搞掂立法會通過擴建計劃，稍一定神後，金Sir未敢鬆懈，近日四出搞好睦鄰關係，準備在星期五推出「樹木保育計劃」，首個得益者就係有大嶼山地主之稱嘅寶蓮寺，迪士尼打算送贈三十棵樹畀寶蓮寺，金民豪請埋寶蓮寺住持釋智慧出席植樹儀式，認真大面子！迪士尼擴建工程動土在即，多少會帶來不便，同寶蓮寺「示好」兼打聲招呼，點計都有佢着數。
其實寶蓮寺綠蔭處處，又使乜等迪士尼送樹！今次送樹行動，睇怕係外交手段居多。記得當年釋智慧一度極力反對興建昂坪纜車，聲言誓死唔肯踏足纜車站半步，搞到政府頭都痕埋，幸好前昂坪360董事總經理張少華夠醒目，上任後隨即去拜會智慧大師，最後仲請到智慧大師畀面坐纜車。所以話，禮多人不怪，金民豪今次照辦煮碗同寶蓮寺搞好睦鄰關係，日後動工打樁就算揼得大力咗，睇怕大師都會放過佢啩！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
