自從○七年兩鐵合併之後，坊間出現「大學站」鬧雙胞嘅爭論，因為除咗原來中文大學旁邊嘅「大學站」外，西港島線連接港大嘅車站依家亦暫時叫做「大學站」，呢兩間大學嘅學生早前更因此掀起罵戰。

百年歷史VS先到先得

中大人爭大學站嘅理據係先到先得，認為冇理由畀港大遲嚟先上岸；不過港大人就話港大有成百年歷史，中大成立只不過得嗰四十六年，論資排輩點都唔應該要港大讓路畀佢哋。

徐立之頂着中大校友同港大校長兩個身份，絕對夠資格評論「大學站」誰屬。究竟徐校長對新車站命名有乜睇法？佢笑言：「我哋梗係想自己有咩啦……」佢冇解釋「咩啦」背後嘅含意，不過就好婉轉咁叫大家「攞番啲歷史出嚟睇」，佢話：「港大大學堂（港大對出嘅巴士站名稱）個名用咗好耐，返去睇吓啲古董巴士都係去大學堂……耐過中大，嗰度以前叫『馬料水』。」徐校長呢番話除咗巧妙反駁外界對港大遲嚟爭先嘅批評外，仲為新車站「正名」提供理據，不過中大人接唔接受佢嘅講法就要問過佢哋至知喇。

其實坊間已經提出幾個方案畀港鐵選擇，唔少人建議兩個車站分別改名為「中文大學」同「香港大學」，免卻爭拗之餘，亦唔會令公眾混淆。不過有人擔心到時又會有聲音要求紅磡站改名做「理工大學」，九龍塘站因為有城市同浸會兩間大學，都唔知叫「城市大學」定「浸會大學」好。另外，仲有網民曾提出一拍兩散嘅方案，建議索性一個叫番「馬料水」，另一個就叫做「寶翠園」，咁大家就唔使喺度拗餐懵喎！

根據慣例，港鐵一般喺通車前先會落實車站名稱，西港島線尋日先正式動工，要等到二○一四年才通車，怕且「大學站」之爭仲要持續好一段日子。