立法會新丁甘乃威瞓身跟進雷曼迷債事件打出名堂，但最近佢就畀雷曼回購方案搞到冇覺好瞓兼冇啖好食。話說甘乃威正攻讀緊浸大搞嘅公共行政管理碩士課程，希望提升議政質素，其中兩份功課原本預咗上月廿六日前起貨，點知中途爆出咗個回購方案，甘乃威被迫喺當日改為同班雷曼苦主開會，然後翌日嘅周一開始唔食飯唔瞓覺通頂趕工，周二下午飛車趕番學校交功課，否則分分鐘畢唔到業。
講開又講，甘乃威話課程嘅其中一位講師係平機會委員，仲問佢有冇入到政府帳目委員會，如果有就請佢手下留情，不過佢相信對方純粹係搞gag講笑，否則等於向佢施壓；再加上帳委會已就平機會醜聞發表報告，呢件事唔會影響佢喺立法會十月復會後，接替黨友加入帳委會嘅決定。翻查資料，平機會委員趙其琨同羅觀翠都喺浸大教書，唔知係邊個咁唔小心開埋啲咁敏感嘅玩笑呢？
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |